శబరిమలకు వెళ్లే భక్తుల కోసం రాష్ట్ర రోడ్డు రవాణా సంస్థ సేవలను మరింత సులభతరం చేసింది. తెలుగు రాష్ట్రాల నుంచి ప్రతీ ఏటా పెద్ద సంఖ్యలో భక్తులు శబరిమలకు వెళ్తుంటారు. గ్రూపులుగా వెళ్లే అయ్యప్ప భక్తులకు అతి తక్కువ ధరకే అద్దె బస్సులు సమకూర్చాలని ఆర్‌టిసి నిర్ణయించింది. ప్రత్యేక సౌకర్యాలను కల్పించనుంది. పలువురికి ప్రత్యేకంగా ఉచిత ప్రయాణం కల్పిస్తోంది. అధికారులు వెల్లడించిన వివరాల ప్రకారం.. శబరిమలకు వెళ్లే అయ్యప్ప భక్తుల కోసం ఆర్‌టిసి అద్దె ప్రాతిపదికన బస్సులను కేటాయించింది. భక్తుల ప్రయాణ ప్రణాళికకు అనుగుణంగా సంస్థ ఈ బస్సులను ఏర్పాటు చేస్తోంది. కర్ణాటక, తమిళనాడు, కేరళ రాష్ట్రాల్లో ఆర్‌టిఓ పన్నులు చెల్లించాల్సిన అవసరం ఉండదు. ఆర్డినరీ, ఎక్స్ ప్రెస్, అల్ట్రాడీలక్స్, సూపర్ లగ్జరీ బస్సులను అద్దె ప్రాతిపదికన అందుబాటులో ఉంచారు.
శబరిమలకు వెళ్లే అయ్యప్ప భక్తుల కోసం తెలంగాణ నలు మూలల నుంచి ప్రత్యేక బస్సులను ఆర్‌టిసి సిద్ధం చేసింది. రాష్ట్ర వ్యాప్తంగా 200 బస్సులను నడపాలని నిర్ణయించింది. సుమారు లక్ష మంది భక్తులకు రవాణా సౌకర్యం కల్పించాలని ఆర్‌టిసి లక్ష్యంగా ఏర్పాట్లు చేస్తూ ప్రతీ డిపోకు రెండు బస్సులు కేటాయించింది. ఈ ప్రత్యేక బస్సులకు ప్యాకేజీలను ఖరారు చేసింది. ప్రయాణ దూరాన్ని బట్టి కిలోమీటరుకు ఛార్జీలు నిర్దారించింది. బస్సుల వెయిటింగ్ సమయానికి గంటకు రూ.300 చొప్పున వెయిటింగ్ ఛార్జి చెల్లించాల్సి ఉంటుందని ఆర్‌టిసి స్పష్టం చేసింది.
గురుస్వామి పేరుతో బస్సు బుక్ చేసుకుంటే ఒక యాత్రికుడి(గురుస్వామి) ఛార్జి అంటే సుమారు రూ.5,498 వరకు డిస్కౌంట్ లభిస్తుంది. అదనంగా రూ.10 వేల కాష్ ను డిపాజిట్‌గా చెల్లించాల్సి ఉంటుంది. యాత్ర పూర్తయిన తర్వాత భక్తులకు తిరిగి చెల్లిస్తారు. రాజధాని బస్సుల్లో 40 సీట్లు ఉంటుండగా కి.మీకు రూ.77 వసూలు చేయనున్నారు. సూపర్ లగ్జరీ బస్సుల్లో 36 సీట్లకు కి.మీకు రూ.59 వసూలు చేయనున్నారు. డీలక్స్ 40 సీట్లకు కి.మీకు రూ.57, ఎక్స్‌ప్రెస్ 50 సీట్లకు కి.మీ రూ.62 వసూలు చేస్తారు. ఈ బస్సుల్లో గురుస్వామికి ఉచితంగా ప్రయాణించే అవకాశం కల్పించారు. భక్తులతో పాటు వచ్చే లగేజ్ అటెండెంట్లు, వంట మాస్టర్లకు కూడా సీట్లు కేటాయించకుండా ఉచిత ప్రయాణానికి అనుమతిస్తారు.
