దంతేవాడ : ఛత్తీస్‌గఢ్‌లో ఆదివారం 37 మంది నక్సలైట్లు లొంగిపోయారు. వీరిలో 27 మందిపై కలిపి మొత్తం మీద రూ 65లక్షల రివార్డు ప్రకటితం అయి ఉంది దంతేవాడ జిల్లా వీరు తమ ముందు సరెండర్ అయినట్లు పోలీసు వర్గాలు ఆదివారం తెలిపాయి. ఇప్పుడు లొంగిపోయిన వారిలో 12 మంది మహిళా నక్సల్స్ ఉన్నారు. రాష్ట్ర ప్రభుత్వం తీసుకువచ్చిన పూనా మార్గెం పునరావాస, సామాజిక సమ్మిళితం కార్యక్రమంలో భాగంగా వీరు తమ మావోయిస్టు పంథా వీడి జనజీవన స్రవంతిలో కలిశారు. ఈ విషయాన్ని మీడియాకు దంతేవాడ ఎస్‌పి గౌరవ్ రాయ్ తెలిపారు.
బస్తర్ ప్రాంతంలో శాఆంతి స్థాపనకు, సమగ్ర ప్రగతికి, గౌరవ మర్యాదల వాతావరణం నెలకొనేలా చేసేందుకు ప్రభుత్వం పునరావాస పథకం తీసుకు వచ్చిందని ఎస్‌పి తెలిపారు. దీనిని ఇప్పటికీ అడవుల్లో ఉన్న మావోయిస్టులు వినియోగించుకుని సరెండర్ కావాలని అభ్యర్థించారు. ఇప్పుడు సరెండర్ అయిన వారిలో కొందరు ముఖ్యులు కూడా ఉన్నారు. కుమాలి అలియాస్ అనిత మాధవి, గీతా అలియాస్ లక్ష్మి మద్కం, రంజన్ అలియాస్ సోమ మందవి , భీమా అలియాస్ జహాజ్ కల్మూ ఉన్నారు. వీరిపై తలో రూ 8 లక్షల పారితోషికం ప్రకటితం అయి ఉంది. కేంద్ర రాష్ట్ర ప్రభుత్వాలు ప్రవేశపెట్టిన పథకాల పరిధిలో ఇప్పటివరకూ 500 మందికి పైగా నక్సలైట్లు లొంగిపోయారని ఎస్‌పి వివరించారు.
