మరో ఏడుగురిపైనా నమోదు..ఇడి కేసుకు స్పందన
రూ.50 లక్షలతో రెండున్నరవేల కోట్లకు ఎసరు అభియోగాలు
న్యూఢిల్లీ : నేషనల్ హెరాల్డ్ మనీలాండరింగ్ కేసుకు సంబంధించి ఢిల్లీ పోలీసు విభాగం స్పందించింది. కాంగ్రెస్ కీలక నేతలు సోనియా గాంధీ, రాహుల్ గాంధీలపై ఢిల్లీ పోలీసు ఎఫ్‌ఐఆర్‌లు దాఖలు చేసింది. వీరితో పాటు మరో ఏడుగురిపై కూడా ఎఫ్‌ఐఆర్‌లు దాఖలు అయినట్లు తెలిపారు. కాంగ్రెస్ పత్రిక నేషనల్ హెరాల్డ్ సంబంధిత నిధుల్లో బదలాయింపులు ఇతరత్రా ఆర్థిక నేరాలు జరిగాయనే కోణంలో ఇడి రంగంలోకి దిగింది. దర్యాప్తును వేగవంతం చేసింది. ఈ క్రమంలోనే ఈ విషయంపై ఇడి నుంచి తమకు అందిన ఫిర్యాదు మేరకు ఇప్పుడు ఎఫ్‌ఐఆర్‌లు దాఖలు చేసినట్లు ఢిల్లీ పోలీసు వర్గాలు తెలిపాయి.
గాంధీలు ఇతరులపై తమకు అక్టోబర్ 3వ తేదీనే ఫిర్యాదు అందిందని వివరించారు. ఇప్పుడు ఈ మేరకు ఎఫ్‌ఐఆర్‌లను దాఖలు చేశారు. క్రిమినల్ కుట్ర, ఆస్తుల దుర్వినియోగం, నేరపూరిత విశ్వాస ఉల్లంఘన, చీటింగ్‌కు సంబంధించిన 420 వంటి సెక్షన్ల పరిధిలో ఇప్పుడు సోనియా , రాహుల్ ఇతరులపై ఎఫ్‌ఐఆర్‌లు నమోదు చేశారు. ఎఫ్‌ఐఆర్‌లు దాఖలు అయిన వారిలో కాంగ్రెస్ ప్రముఖులు మోతీలాల్ వోరా, ఆస్కార్ ఫెర్నాండెజ్, సుమన్ దూబే, సామ్ పిట్రోడా, యంగ్ ఇండియా, డోటెక్స్ మార్కండైజ్ లిమిటెడ్, డోటెక్స్ ప్రమోటర్ సునీల్ భండారితో పాటు అసోసియేటెడ్ జర్నలిస్టు లిమిటెడ్ (ఎజెఎల్) పేర్లు ఉన్నాయి. వీరిని నిందితులుగా చేర్చారు. కాగా ఆస్కార్ ఫెర్నాండెజ్, మోతీలాల్ వోరాలు మృతి చెందారు.
నిందితులు తమ వంతుగా రూ 50 లక్షలే చెల్లించి ఎజెఎల్‌కు చెందిన రూ 2500కోట్ల విలువైన ఆస్తులపై అధికారం పొందారని, ఈ క్రమంలో ఈ వ్యవహారంలో భారీ స్థాయిలో మనీలాండరింగ్ జరిగినట్లు గుర్తించామని ఇడి తెలిపింది. ఈ మేరకు ఢిల్లీ పోలీసులు స్పందించారు. ఈ కేసులో పోలీసు ఎఫ్‌ఐఆర్ దాఖలు కావడంతో సంబంధిత నిందితులను పోలీసులు అరెస్టు చేసే అధికారం ఉంటుంది. ఈ విషయంపై కాంగ్రెస్ వర్గాలలలో కలవరానికి దారితీసింది. ఇడి కేసుకు సంబంధించి డిసెంబర్ 16వ తేదీన తదుపరి విచారణ జరుగుతుంది. ఈలోగా ఢిల్లీ పోలీసుల ఎఫ్‌ఐఆర్ దాఖలుపై న్యాయస్థానం స్పందన వెలువడాల్సి ఉంది.
మోడీ, అమిత్ షా రాజకీయ వేధింపులు, బెదిరింపులు: కాంగ్రెస్ ఆగ్రహం
ఇడి పిర్యాదుతో తమ నేతలపై ఢిల్లీ పోలీసు ఎఫ్‌ఐఆర్ దాఖలు కావడం గర్హనీయం అని కాంగ్రెస్ పార్టీ స్పందించింది. ఈ మేరకు సీనియర్ నేత జైరాం రమేష్ ప్రకటన వెవరించారు. రాజకీయ ప్రత్యర్థులపై మోడీ అమిత్ షాల వేధింపులు బెదిరింపుల పర్వం సాగుతోందని తెలిపారు.ఇది కక్షసాధింపు చర్య అని వ్యాఖ్యానించారు. బెదిరింపులకు దిగేవారే అభద్రతతో భయాలతో కొట్టుమిట్టాడుతున్నారని జైరాం రమేష్ వ్యాఖ్యానించారు. ఈ కేసు బోగస్, సత్యమే గెలుస్తుందని జై రాం రమేష్ , మరో నేత అభిషేక్ మనూ సింఘ్వీ తెలిపారు. సారా కానీ సీసా కానీ చివరికి గ్లాసులు కానీ కొత్తవి కావని, ఇదంతా కూడా పాత సీసా మూతలు తెరవడం కథ అని సింఘ్వీ చమత్కరించారు.
