పాకిస్థాన్ మాజీ ప్రధాన మంత్రి , పీటీఐ పార్టీ అధినేత ఇమ్రాన్ ఖాన్ హత్యకు గురై ఉండవచ్చని ప్రచారం జరిగిన సంగతి తెలిసిందే. ఈ నేపథ్యంలో ఇమ్రాన్ ఖాన్ కుమారుడు కాసింఖాన్ తన తండ్రి ప్రాణాలతో ఉన్నారని చెప్పడానికి ప్రభుత్వాన్ని రుజువు కోరారు. “నా తండ్రి అరెస్ట్ అయి 845 రోజులు అయింది. గత ఆరు వారాలుగా ఆయనను డెత్‌సెల్‌లో ఒంటరిగా ఉంచారు. ఆయనను కలుసుకోవచ్చని కోర్టు ఆదేశించినప్పటికీ ఆయన సోదరీమణులను కూడా అనుమతించడం లేదు. ఫోన్ కాల్స్ లేవు. సమావేశాలు లేవు. నేను కానీ నా సోదరుడు కానీ ఆయనను కలుసుకోలేకపోతున్నాం. ” అని కాశిం ఆవేదన వెలిబుచ్చారు. ఇలా పూర్తిగా చీకటిలో మగ్గేలా ఉంచడం ఏ ప్రోటోకాల్‌లోనూ భాగం కాదని ఆయన దుయ్యబట్టారు. ఈ విధంగా తన తండ్రి ఆరోగ్యం గురించి మాకు తెలియకుండా ఉండాలని ఉద్దేశపూర్వకంగా చేస్తున్నట్టు కనిపిస్తోందని ఆరోపించారు. తన తండ్రి విషయంలో అంతర్జాతీయ మానవ హక్కుల సంఘాలు జోక్యం చేసుకోవాలని, కోరారు. తన తండ్రి సజీవంగా ఉన్నట్టు ఆధారాలు చూపించాలని ప్రభుత్వాన్ని డిమాండ్ చేశారు.
